ابوذيات عتاااااااااااب

(أبو ذيـــات عتب)
منو مثلي بدال امك يرابيــــك
وعيني على الدرب حارس يرابيك
حبيبك ما يرى بعينه يرى بـيك
عميت من قطعت وصلك عليه
تهزهز يا قبر وانفض ترابيـك
وعزيز الروح هالنايم ترى بيك
اجاني العيد وعيوني تــرابيك ولك مرني ولتشمت اعدي بيه
سيوف جفاك بالدلال ماظن
وليالي هواك بالأحلام ماظن
چنت بعد الموده تخون ماظن
لچن خابت ظنوني البيك هيه
أحبابي اشلون حالتكم بعدنا
اشبدينا والوكَت عنـكم بعدنا
إذا انتم نسيتوا احنا بعدنا
أبذكركم كل صباح وكل مسيه
شوف اشسال من جرحي وشده
وعلي تصعب مداواته وشده
نخيت اشجم خوي بهمه وشده
يصير اصعب من اعدائي عليه
انا بلياك حتى الماي مرمر (بمعنى المراره)
كلب شفاف كلبي وانته مرمر (حجر المرمر)
عجب يرضيك يا خلي اتمرمر (اتعذب)
هلي والناس والدنيه عليه
نفسك دوم حاسبها ولمه
تره امن ايديك مسرتها وألمه
فقير الحرص عالدنيا ولمه
وغني اليقنع ابرزقه لبلا شجيه
العكل يبني حكيم اليوم ونصاح
اترهدن وانعل الشيطان ونصاح
اشما ارشدك وعلم بيك ونصاح
تتوب وتوبتك حد الضحيه
الدمع نهران من العين ينساب
طريح اولا صفالي الوكت ينساب
اليسب الناس لابد يوم ينساب
ويظل مكروه مابين البريه
يليل الشوك امري اوياك فضه
وكلبي امن الكدر مايوم فضه
الكلام ابغير وسبب فضه
السكوت امن الذهب بين البريه
نهران الدمع عالوجن تجري
خساره اولانفع بالطيب تجري
المصايب لو على كل بشر تجري
فلا بطران يوم ايلوم بيه

لدك وانحب وخلي الشوك ينباح
واصرخ لمن صوتي اعليك ينباح
حشه السامع اشنفع الجاب ينباح
الوفي ميهاب حتى امن المنيه

انياب الدهر عظني ولاجن
ابهيمه ولاذره عندي ولا جن
رضيت بقسمه الباري ولاجن
اشوفه عد غيري وتشب نيران بيه
حبيبي وين حجيك وين وعداك
ابهجرك شمتيت اعداي وعداك
الدنيا اوياك حلوة اهواي وعداك
مرار وكل لياليها اذيه
شبابي شد على ارحاله وضعنه
وسالوفة بحلك شامت وضعنه
غطاها الليل اثاري وضعنه
وصفيت ابلا رشد فوك الوطيه
كلبي بالونين شلون يلام
وجرح الشوك حدر الضلع يلام
الماي التبده اشلون يلام
هويته وما يفيد اللوم بيه
اسهامك وصلن الجبدي ولاحن
وكلبك ما بجه الحالي ولاحن
ابليالي العيد لا افرح ولاحن
لجلك يالكطعت الوصل بيه
الدهر مايوم حن كلبه ولانه
تفاركنه ولف واشي ولانه
لانت تصون الحب ولانه
وظلمنه الشوك والعشره سويه

بارك اللة فيك شعر حلو